اسلام آباد۔10ستمبر (اے پی پی) وزیراعظم محمد شہباز شریف آکھیے جو پاکستان اتے بحرین دے برادرانہ تعلقات ویلھے دے نال ٻئے تکڑے تھییندے پئن، ݙوہیں ملکاں وچال تجارت سودھے ٻئے مختلف شعبیں اچ تعاون ودھاوݨ دے خواہشمند ایسے، اساݙی خواہش اے جو بحرین پاکستان اچ مختلف شعبیں اچ سرمایہ کاری کرے۔ وزیراعظم دفتر دے میڈیا ونگ توں جاری بیان موجب انہاں اے ڳالھ اتھاں بحرین دے وزیر داخلہ جنرل راشد بن عبداللہ الخلیفہ کوں آکھی جنہاں وزیراعظم ہائوس اچ انہاں نال ملاقات کیتی۔ وزیراعظم بحرین دے وزیر داخلہ کوں پاکستان آوݨ تے خوش آمدید آکھیے ۔ وزیراعظم بحرین دے شاہ حمد بن عیسیٰ الخلیفہ کیتے نیک خواہشات دا اظہار کیتا۔ انہاں آکھیے جو بحرین اتے پاکستان دے گھاٹےبرادرانہ تعلقات ہن جیڑھے ویلھے دے نال ٻئے تکڑے تھیندے پئن ۔ انہاں آکھیے جو پاکستان بحرین دے نال تجارت سودھے ٻئے مختلف شعبیں اچ تعاون ودھاوݨ دا خواہشمند اے۔ انہاں آکھیے جو بحرین اچ ہک لکھ 20 ہزار دے نیڑے پاکستانی موجود ہن جیڑھے ݙوہیں ملکاں دی ترقی اچ ہک کردار ادا کریندے پئن۔ وزیراعظم آکھیے جو پاکستان بحرین دے سرمایہ کاراں اتے کاروباری لوکاں کیتے تکھے ویزا پراسیسنگ دیاں سہولتاں ݙیندا پئے۔ انہاں آکھیے جو اساݙی خواہش اے جو بحرین پاکستان اچ مختلف شعبیں اچ سرمایہ کاری کرے۔ اساں ٻاہرلے سرمایہ کاراں اتے کاروباری لوکاں کوں ہر ممکن سہولت ݙیوݨ کیتے کوشاں ہیسے، خصوصی سرمایہ کاری سہولت کونسل ایں حوالے نال اہم کردار ادا کریندی پئی اے۔ وزیراعظم بحرین دے پولیس اہلکاراں دی نیشنل پولیس اکیڈمی اسلام آباد اچ تربیت کیتے وی پیشکش کیتی۔ بحرین دے وزیر داخلہ پاکستان اچ پرتپاک استقبال اتے میزبانی تے وزیراعظم دا شکریہ ادا کیتا۔ ملاقات اچ نائب وزیراعظم / وزیر خارجہ اسحاق ڈار، وفاقی وزیر داخلہ محسن نقوی، وزیر مملکت داخلہ طلال چوہدری، وزیراعظم دے معاون خصوصی طارق فاطمی اتے متعلقہ اعلیٰ سرکاری افسر وی موجود ہن۔
